由2月14起長達8日電腦節正式今晚閉幕，雖然今屆同樣鬧雙胞胎，但兩陣都吸引大量人流購物。不過，除左收看雙方有幾多人次或幾多營業額外，實際從消費者角度又點睇兩個電腦節呢?
作為消費者，電腦節邊個搞、邊度搞都唔係咩一回事，最重當然係買到特價心頭好。不過，每次電腦節大家都會考慮一個問題，究竟去個場先買到最平貨品呢? 經過本網兩邊都採訪後，發現兩邊會場都有不同取向，首先「腦場」會集中LCD產品及部分DIY產品，而「長沙灣」則以Notebook、iDTV及相機 等，論購物選擇「長沙灣」一定較豐富，但條件是付出$5入場費。
或許大家聽到入場費都感覺負面，但事實$5 除左可以得到「小食福袋」(限量派發)，更重要係換來寬闊環境，不如「腦場」過份人多擠迫，同時亦無冷氣不足像缺氧的情況，除左星期六落雨有點狼狽，實際環境都以「長沙灣」行得舒適。
至於活動，兩邊電腦節都有特價品限量發售，其中「腦場」以$1 4GB USB手指及減價千元的Notebook最為吸引，其次還有舊芒以 $699換流22吋LCD顯示器。「長沙灣」方面，相信從電視都睇到 1折買iPad、iPhone連合約及半價Canon數碼相機等，淨係產品價值唔講都知「長沙灣」贏盡個勢了。
最後價格方面，雖然「腦場」全場貨品早於14日已更改至電腦節售價，其中包括18.5吋LCD低至$599及$499 750GB外置硬碟，但實際其他產品售價由14日到17日都咩大改變。直至「長沙灣」開幕後，Notebook及部分LCD售價才開始發力，所以要執平野18號才叫正式開始，同時亦話俾大家「長沙灣」才是價格的指標。
而電腦節最後一日，本網再度到兩邊會場採訪，發現「腦場」產品價格與14日時無咩大變動(Notebook除外)，而「長沙灣」唔洗講都知會平過開幕時(賣唔晒運走都要成本)，其中Printer 最平低至$199，而LCD更一度出現過 19吋LED LCD賣$499，更好笑的是小食檔都有減價，$10有N粒魚蛋食到您飽，情況如年三十晚行年宵咁，無疑係數平貨的最後衝刺。
總結:
總括而言，長達8日電腦節，本網記者都行過晒，但講行、睇野買野、排隊換購及活動都以「長沙灣」較優勝，即使要收$5仍然覺得值回票價，更何況近年兩邊電腦節買芒都係無得試，點解唔揀個行得舒服o的呢?