《留給最愛的情書》監製改編美國愛情小說天后艾美莉芝芬作品“Something Borrowed”，以大都會紐約為背景，炮製一齣冧爆全城嘅喜劇。姬蒂赫遜夥拍珍妮花高雲，一對好姊妹，為愛情爭崩頭，爭奪由Versace、Armani男模哥連‧艾高斯菲特飾演嘅型男律師，保證好睇過癮！
當年唔小心讓愛 今日要「借返嚟愛」！
6年前，瑞琪(珍妮花高雲 飾) 俾好姐妹達茜(姬蒂赫遜 飾)橫刀奪愛，搶走咗靚仔迪斯(哥連‧艾高斯菲特 飾)…6年後，瑞琪就嚟踏入3字頭，達茜竟送嚟「意外」賀禮─佢要同迪斯結婚，伴娘更預埋瑞琪一份！愁爆嘅瑞琪當晚以酒消愁；點知一醒返，就見到迪斯光脫脫瞓喺床邊！？為免變成「小三」兼破壞好姐妹終身大事，瑞琪極力逃避迪斯嘅糾纏。但越逃避，越明白自己仍未忘情。為咗捉緊真愛，瑞琪決定喺達茜結婚之前，向好姐妹正式宣戰，將迪斯「借」返嚟愛多次！？
俾妳係瑞琪，妳會點收科？
浪漫喜劇天后 “肉”搏 新紥愛情片女王 勁冧爆笑 媲美《新娘愛鬥大》
由《10天戀愛有限期》(How To Lose A Guy In 10 Days)到《新娘愛鬥大》(Bride Wars)，近年演愛情喜劇演到上哂身嘅天后姬蒂赫遜，齣齣作品都係賣座保證；今次夥拍同樣演繹愛情電影有一手嘅新紥喜劇女王珍妮花高雲，瞓身露肉sexy wild，勢必爆出超強化學作用，風趣抵死比《新娘愛鬥大》絕對不遑多讓。
事實上，今次《婚前借愛》與《新娘愛鬥大》一樣，都係以一對好姐妹為主角； 《新娘愛鬥大》以“女強人vs.小學敎師”；《婚前借愛》就同樣抵死過癮，以色慾又巴辣嘅新娘，惡鬥純情鵪鶉中女伴娘，齋睇牌面已經夠哂爆趣！「型男索女+浪漫愛情+喜劇+沙灘鬥法」，無疑係一套啱哂今個夏天，拍拖入場欣賞嘅消暑佳品。
貫徹切作風，姬蒂赫遜一如以往，繼續窒人唔駛本。今次在《婚》片中對白生鬼啜核，Mean到不得了，簡直係一班OL心目中現代女性嘅最佳代言人。同場拍住佢嘅，就係於《收錯愛情風》當中令人留下難忘印象嘅珍妮花高雲。上次《收錯愛情風》集合咗「性感女神」史嘉莉祖安遜(Scarlett Johansson)，「魅力型男」畢列谷巴(Bradley Cooper)，以及「畢佬前妻」珍妮花安妮絲頓(Jennifer Aniston)等荷里活當紅巨星合演；但珍妮花高雲依然能夠突圍而出，憑「儍大姐」表現俘虜唔少觀眾嘅心，令唔少影評人諗起初出道時候嘅姬蒂赫遜，「『表面上成日自嘲自娛；但電影中往往表現出脆弱、堅強嘅特質，感覺份外討好吸引，令覯眾一見難忘！』USA Today」 上次《新娘愛鬥大》造就咗安妮夏菲維(Anne Hathaway)成功上位，今舖珍妮花高雲，絕對有力彈出，挑戰將為人母嘅姬蒂赫遜荷里活喜劇一姐嘅地位。
獨家專訪！男女主角、影后監製 「我籌備呢套戲足足20年喇！」
為咗更深入了解《婚前借愛》嘅製作過程，電影網站IMDB就率先揾嚟三位主角姬蒂赫遜、珍妮花高雲，以及約翰‧卡辛斯基做訪問；另外，影后兼監製希拉莉絲韻(Hilary Swank)更加現身，詳談作為監製新手嘅感受：
姬：姬蒂赫遜 珍：
珍妮花高雲 約：約翰卡辛斯基
希：希拉莉絲韻
你覺得《婚前借愛》最大賣點係咩？
希：《婚前借愛》最大賣點係忠於原著。我哋只係改動過小說版嘅1個細節。有感動位，又有笑位，小說忠實讀者一定會鍾意呢套戲！
珍：《婚前借愛》唔係一套要引你瘋狂大笑嘅電影，當中談及咗好多「中女 / 中佬30」所遇到嘅感情問題。劇中人物關係複雜，甚至有啲混亂；但係好真實！
約：當初我接到劇本之時，就覺得《婚前借愛》係一套輕鬆幽默嘅愛情片，多過似一齣愛情喜劇。劇中人物關係複雜而真實，易令人產生共鳴
姬：喺拍攝初期，監製希拉莉絲韻講過，佢覺得《婚前借愛》係一齣以女性主導愛情電影。我覺得唔只咁囉，佢仲好有話題性；佢唔似一般荷里活電影有個Happy Ending，但就會令觀眾睇完之後對身邊感情關係有所反思。
點解會用上姬蒂赫遜同珍妮花高雲兩位女主角？
希：初次閱讀劇本嘅時候，我腦海裡即刻出現姬蒂赫遜同珍妮花高雲嘅影子，難得係Molly Mickler Smith(本片另一監製)亦有同感。於是我哋首先揾嚟珍妮花；之後再約姬蒂赫遜面試。佢當時正拍攝另一齣不同類型嘅電影，但都抽空出席試鏡。我真係要多謝佢！
身為影后，對於依家身兼監製工作，有冇幫助？
希：問得好。以前我只係負責演，從來冇深入去硏究過製作方面嘅工作；直至監製《婚前借愛》，由揾搵導演、演員，到控制成本都要一腳踢兼顧，先至明白佢哋嘅困難。難怪奧斯卡頒奬台上面，咁多得奬監製會講：「我籌備呢套戲足足20年喇！」
姬蒂赫遜、珍妮花高雲訪問片段，即睇：http://www.imdb.com/video/imdb/vi3003292953/
約翰‧卡辛斯基訪問片段，即睇：http://www.imdb.com/video/imdb/vi3758267673/
希拉莉絲韻訪問片段，即睇：http://www.imdb.com/video/imdb/vi1174641945/
電影資料
電影名稱：婚前借愛 (SOMETHING BORROWED)
監製: 希拉莉絲韻 (Hilary Swank)
演員: 姬蒂赫遜、珍妮花高雲、約翰卡辛斯基
上映日期： 2011年6月16日
香港發行：洲立影片發行(香港)有限公司
圖片集
