上月底AMD最新APU Llano正式發售，相信唔少人睇完評測都想組裝一部，但畢竟APU在DIY市場仍是新事物，究竟點砌先可以發揮APU最大優勢? 這回選購攻略將會為大家逐一詳細講解。
為何選擇 APU ?
自Sandy Bridge推出後，今年砌機都多左人採納內建顯示，全因打機以外幾乎所有功能都滿足得到，加上功耗較低，難怪大受ITX系統歡迎。不過，AMD新推出的APU Llano，賣點同樣是內建顯示架構，但除左DirectX 11規格優勢，更重要效能達至Radeon HD 6550級數，最起碼足夠應付現今遊戲最低水平，而且效果順暢，配合4核CPU架構，功耗亦低於200W，真正滿足非打機用戶對打機的需求，相比Core i3無疑是更理想整合方案。
A6-3650 & A8-3850之決擇
現時APU Llano有A6-3650及A8-3850兩款選擇，它們售價為$990及$1190，兩者差價只有$200，對未曾接觸過APU的用家，選擇起來自然會感到困難。事實上，選擇APU除左留意核心數目及時脈高低，更重要係將內建顯示為考慮重心。全因APU售價高低，主要受不同內建顯示影響，加上內建顯示無法升級，如果長遠都唔打算加裝顯示卡，建議選擇內建顯示較強的A8-3850較化算。相反如果組裝時已計劃加裝高階顯示卡，內建顯示就會變成「白買」，令組裝成本提高，此時選擇A6-3650甚至選擇Phenom II x4系列會是較佳方案。