▲ 呢部就係比在下攞走既 Samsung Galaxy Note
.
先前見到某編輯台面有一部牛乸咁大既手機，眼見四維冇人，嗱嗱淋拎左出街先！拎出街做乜？瘋影有名比你叫架啦，「瘋影」喎，重要係「初代目」，更係拎去影相啦！
▲ 攞左部機第一件事就更係要做更新先啦！
.
▲ 跟住就去影下靚女希拉莉！（美國個位阿嬸就留返比克林頓慢慢影喇）
.
拎出去冇耐個牛乸咁大既電話即刻響，冇法，局住聽，咁就更係比人媽差啦！瘋影更係懶好心咁即刻話幫手試電話，寫埋稿比你得喇掛？對方話兩日咁多啦， 我心諗邊夠玩呀！佢加多句話果邊係比得咁少時間，一係就即刻拎返去，一係就應承。冇計啦，維有猛話OKOK敷衍住先，心諗做詳測就啋你都傻啦咁少時 間，影下相等自己過下癮寫返兩句就冇所謂！
▲ 部Note影相機好多選項可以揀，正！
．
▲ 攞景時個介面就係咁樣
．
▲ 玩下書法先，係咪有D王羲之既Feel呢！
．
呢部機拎出街真係好High，舉高影相時四周維D人打雀咁眼望住你，等你重以為火車未到站或者著左條D&G牌under係條長褲出面咁樣 樣！你知而家D人好眼利，一睇就知呢部唔係Pad或者Tab，而係薯嘜phone。何解？5.3 吋作為手機黎講就叫牛乸姐，在Pad同Tab既角度10吋比比皆是啦係咪？個個黎遠一睇就見到係Phone，點會唔望多兩眼呀！況且部機剛剛發布冇耐都未 賣通街，收視率實在相當高，估計超過80點， D無記劇集全部行埋一邊！
▲ 800萬像魅力源自呢度
．
求先除左話High之外，用部機黎影相又真係好爽，5.3吋加上”1280 x 800 pixels” 既 “HD Super AMOLED” 影相同睇相都夠大夠靚，好似瘋影呢D有老花但又未去到老人癡呆既，真係覺得Samsung對我不薄喇！兼且呢部係當今能袋落褲袋中又唔會拎唔返出黎既最大 部手機。點解呢部野會咁有吸引力呢？想當日Dell咪出過部5吋既Android機出黎，但點解又冇乜人有興趣呢，唔通係牌子問題（讀音乎）？定或係唔夠 吋(冇理由丫，差0.3吋之嘛)？定係當日既Android未夠把炮呢（Android 1.6）？但我相信單憑瘋影之力係無法解開呢個迷團既，如果你諗到咩理由既不妨留個言等讀者參詳參詳……
▲ 2500mAh比起傳說中既小米更犀利！
．
部機影相得唔得呀？就算我唔講，大家睇相都知道答案啦！不過都要講返一句半句，真係得囉！微距時呢部唔算距離最埋，但都係高質素表現。同埋你知瘋影 係影相人，對隻芒都有要求，呢隻芒跟Galaxy S II 同級，但出廠設定已經冇左果種唔係「青bb」就「黃琴琴」既情況，感覺良好！最重要一點係部機電都算係咁，冇話因為個芒大而倒水咁倒點解？舊電量大囉！總知人地問你Samsung Galaxy Note乜都好，總知你答「大囉」就得，包冇撞版架喇！
▲ 由上至下：紅黃藍綠夜攝加微距，日頭夜晚室內戶外試哂。
．
（一代瘋影）