Shure 今次緊貼潮流，推出紅色Special Edition SE535，色彩奪目，筆者戴上亦特別吸引途人目光，彷彿自己變成犀利哥級型男一樣！要做潮人，唔再係用朱古力豆豆耳機o既小妹妹專利。
SE535 入耳式耳機設計配合人體工學，戴上感覺舒服，隔音結果良好。一般耳機損壞主因都係耳機線勞損，SE535可換線設計，正方便更換，保證上佳音色長聽長有，亦可以換上原裝iPhone系列專用耳機線，方便聽歌都唔會接唔到電話。
開始試聽，感覺震撼。細致o既清晰度，會一下子搶走筆者o既注意力，一聽就會好難放低。Shure 535 音色比較接近鑑聽級別，音場夠闊，唔會有特別強o既高中低頻做出”太搶”o既效果。筆者讀書年代曾經玩過合唱團，對用聲，運氣方法有基本認知，所以比較喜歡聽人聲o既 Details，可以觀摩歌手o既唱法。係短短o既試聽時間，Shure 535 都可以幫到筆者更清楚深入咁去聽歌手o既唱法。
換上原裝黃綿，隔音效果更佳，音色亦比較厚實，用來聽 Rock 一流！打開 Beyond 03 演唱會，聽到午夜迷牆o既結他 Solo 一段，就好考器材表達o既仔細度，而535 o既三單元設計，帶出強而有力o既低音之餘，同時好清晰表達電子結他彈o既每一下，感覺相當驚喜。
而試聽 The Eagles 例牌 Hotel California Live 版頭段，張國榮o既暴風一族等，鼓聲「澎澎聲」之餘亦清楚聽到每一下o既層次。
換上原裝黑綿聽 Sarah Brightman，聲音圓潤，三單元o既清晰亦俾到筆者一道靈光o既感覺。而聽其他女聲，亦係非常好o既享受。試聽完，成個人都開心o左。筆者並非吸毒之人，肯定係耳機之功！Shure SE535 實屬誠意推介！
當買了一個清晰度如此高的耳機回家時，你會很快發現，你可以重新認識你所有的 CD 珍藏，去將你收到櫃底，浸滿塵o既唱碟都聽一次吧，你會覺得好似在聽新歌一樣。
但如果o係街上過聽歌時，就要注意馬路車輛，因為當你沉醉於你o既音樂世界o既時候，你會不自覺變成一個”發緊夢o既失聰路人”，小心小心。
.
SHURE Special Edition SE535 建議零售價港幣$3,900
.
文：Strider