[購物Q&A]「平板電腦」選購疑難 逐一解答

訪問對象 訊達科技 Terry

平板電腦價錢平選擇多，相信大家都會玩返部黎玩下。不過，規格花多眼亂，眼見好多人選購時都一頭霧水，所以「購物Q&A」同著名出售平板電腦的「訊達科技」造個訪問，並會為大家解答一些購買平板上的疑難。

Q1.) 買機點分行貨水貨?

平板電腦選擇繁多，國產款式更是數之不盡，故此行貨水貨問題非常普遍。當然兩者主要係價錢分別，一般差價約$200-$300。不過，水貨存在好多問題，例如保養期特別短，最短只有三個月，而欠缺品質監控，好多時新機都會出現瑕疵，加上唔係代理提供保養，萬一換機或維修可能會花較長時間，值唔值真係見仁見智。至於行貨識別，好多代理都會在包裝及產品上有鐳射貼紙，萬一唔清楚都可以問下店員，當然要搵間信譽利好架喇!

Q2.) 邊部平板睇到myTV?

大部分人選購平板電腦都係一心想睇myTV，而一部機睇唔睇到，首要條件係有無Flash支援，同時版本亦要 10.3 或以上。當然 myTV 專用Apps 唔係每部機都兼容，但最起碼支援Flash 就可以睇網頁版。至於順暢問題，一般具備 1GB RAM 及1GHz CPU 機種都可以順暢收看，當然唔合要求都會睇到，但就會出現窒機或聲畫唔同步等情況。

Q3. 部機舊電用到幾耐？唔夠有無得充?

現時平板電腦電池容量普遍由3200mAh到6000mAh不等，一般足夠應付 4-5小時用量，當然睇myTV或打機用途會消耗得更快。如果消費者覺得電量不足，其實可以好似手機咁使用流動電池充電，但條件係平板必須擁有 5V 電源輸入，電流量亦要界乎1A-2A 才可配合流動電池輸出，容量方面，大家可以平板的電量作標準，但建議最少都要 4000mAh 或以上，而且好多機都唔可以透過USB 充電，所以選購電池時要記得配埋轉線。

專題後記:

講過行貨、myTV 及電池問題後，相信讀者仍然有好多問題需要解答，所有本網稍後會同 Terry 繼續跟進選購平板電腦的問題，各位讀者想知更多疑難問題，記得繼續收睇「購物Q&A」。