當筆者一拿起 AKG 新產品 K550，五隻手指話俾筆者知道，呢隻耳機，一啲都唔會馬虎。由佢外殼仔細嘅打磨，至到調校大小嘅緊密手感，都俾筆者感覺一絲不苟，可惜家用設計，線太長，唔方便拎出街型。
戴上耳機，真皮耳套柔軟舒服，配合耳機高級質感之餘，套上雙耳亦有良好保暖效果。相信特別適合冬天使用。
欣賞一輪之後，望望筆者電腦樣衰衰嘅膠機箱，即時有種對比，襯佢唔起……
播片試聲！體驗佢 50mm Driver 嘅威力，揀《轟天猛將》 (The Expendables)，嘅槍戰場面，炮火聲強勁而真實，去得快收得亦快，而且定位做到野，可以清楚聽到子彈由你右邊經過中間射到去左邊，就好似喺你身邊飛過一樣。
K550 沒有一味追求 Bass 「澎澎聲」，低音冇好誇張，反而真實感更強！對追求音質嘅朋友，要聽真一套戲，或者一隻射擊遊戲嘅炮火聲，呢個係比一般靠嘈嘅耳機更好嘅選擇。
AKG K550 唔止音場夠闊，值得一讚嘅係佢嘅 Details 非常細緻，甚至媲美筆者心之所鍾，接近佢兩倍價錢嘅三單元耳機 (頂佢)。
如果要重溫一隻電腦 Game 有煥然一新嘅感覺，一個方法就係首先換過個芒，感受放大嘅畫面同加大解像度，另一方法就係換一隻 Details 強勁嘅耳機，從新認識音效之餘，你會懷疑你正在玩緊隻 Game 嘅加強版～！
但去到聽歌方面，女聲就係 K550 嘅弱點。當駁上 iPod Classic (係，iPod Classic 可以推得佢起)，播起 Sarah Brightman 嘅超高音，聲音淡，甜味幾乎消失。而轉聽王菲，彭羚，女聲亦嫌單薄。
K550煲夠鐘數後嘅低音表現，一播男聲，就即刻番番嚟。轉聽李泉嘅《走鋼索的人》，張國榮嘅《暴風一族》等等，強勁震撼，非常有 Feel～！
總結
K550 唔係全能耳機，聽歌只限男聲並唔夠全面。但如果主要用套係喺屋企睇戲打機，而要求音質細緻有真實感，仲要外觀襯得起高級家庭影院系統 / 鋁合金電腦機箱嘅，K550 相當適合！
(編者按：AKG K550 已兩度斷市，有意購買的讀者可向通利琴行訂貨，售價為$1,980-)
.
文：Strider