今次試玩嘅係 AKG K167 家用耳機。外型靚靚仔仔，感覺耐用。試身，此耳機對筆者嘅頭勒得比較緊，配合其真皮護墊，做出嘅隔音效果非常好！就咁戴上耳機，周圍嘅聲音合理減弱，音樂開始，外界漏入嘅聲完全被掩蓋！打機中途，屋企人大聲呼喚無效，要用到敲問(敲頭嘅敲)嘅方式去證實小弟依然對外界有知覺。
今次嘅耳機係家用設計，如果用手機或者用一粒 AAA 電嘅 MP3 去推會比較吃力。筆者嘗試用 iPod Classic 播歌，都總算推得起夠聲。反正用電腦擴音機去推家用耳機，亦好合理~!
呢款耳機耳罩採用圓形設計，但唔係巨型 size，對大耳人士嚟講，戴咗幾個鐘唔除，雙耳係會痛 (但戴住佢打機睇戲自然會幾個鐘唔捨得除，非常矛盾)。
播歌試聲，Details 夠清晰，就算係處理急速嘅節奏同複雜樂器聲，例如 Beyond 05 演唱會，我是憤怒嘅結他伴奏，都可以清楚交代，而且有力，完全唔會有黐埋一舊嘅程況，呢點抵讚！
K167 唔係針對中音高音女聲愛好者市場，但好在齒音輕微，就算聽張敬軒一首好危險嘅追風箏的孩子，齒音亦唔突出，唔會破壞首歌嘅感覺。
去到低音就係佢嘅強項~! AKG 167 唔單止勁，佢仲可以用低音營造一種氣氛，令人特別容易投入佢做出嚟嘅環境，而做得好嘅地方係中高音都夠，唔會俾呢種氣氛蓋過而破壞平衡。筆者用佢嚟玩第一身射擊 Crysis 2 實在非常投入，煲到爆機，連停背景音樂都唔捨得停！呢隻耳機完全做到隻 Game 要嘅槍聲同微微恐怖嘅氣氛！
香港人嘅居住環境未必好寧靜，尤其一屋多人同住，如果唔想互相騷擾，最 High 玩法就係自閉焚機。用 AKG K167 發燒打機睇戲就係非常適合嘅選擇~！
.
AKG K167 訂價港幣 $2,090-
.
文：Strider
編輯：Johnny Chen