幾乎每個屋企都一定有一個無線網絡，但香港人口咁密集 Wi-Fi 訊號變得容易受干擾。唔少人以為好似會考聽聆咁，伸長自己部收音機天線就可以收得清啲，以為換隻天線多啲，訊息強啲嘅路由器就可以解決問題。事實上Wi-Fi 訊號干擾大多係因為太多人共用一條頻道搞到「大塞車」。
唔少人係設定路由器嘅時候都忽略咗選擇頻道嘅重要性。你可以將 Wi-Fi 睇成隧道，比較普遍又用得耐嘅 2.4GHz 就係紅隧。因為 2.4GHz 同時有 14條行車線，如果同一個頻道內有太多 Wi-Fi 裝置同時使用，就有機會互相干擾，就算網絡速度再快，前面有架車塞住都係郁唔到，所以係設定路由器嘅時候最好揀一條較少人用嘅頻道。
要知道邊個頻道少人用，就同番工前睇路面交通消息一樣簡單。用 Android 裝置安裝《Wifi 分析儀》app 就可以掃描到隔離屋用緊咩 Wi-Fi 頻道。好簡單，睇到邊條少人用就用邊條，一個人霸晒成條路就點行都得啦！
2.4GHz 就好似紅隧一樣，因為開放得早，大部份無線相關周邊產品，包括使用藍牙嘅鍵盤、滑鼠，同樣都係以 2.4GHz 無線技術為主。試問咁多車一齊行又點會暢順。所以為咗避免干擾，愈來愈多廠商轉以 5GHz 來取代原本的 2.4GHz 頻段。
雖然無論用邊個頻譜，理論上速度都一樣，但 5GHz 比較少裝置會用，加上提供更多頻段數量可以用，出現干擾的情況比較少。
亦因為同一頻道唔可以同時有太多裝置，所以宜家唔少路由器都有 2.4GHz 同 5GHz 俾你揀，紅隧塞車可以行西隧。好似 NETGEAR Nighthawk X6 嘅三頻路由器就相繼出現，呢類路由器唔單止有更多頻道可以揀，仲會按實際情況自動轉換。識得切線嘅車點比新手行死一條路快吧！
知道咗個原理，咁以後就唔洗同隔離屋爭頻道，令自己上網更暢順啦！
