打個乞嗤都會漏啲潮流氣息出嚟嘅你，又點會忍受到掌管你半生幸福，日對夜對嘅WiFi Router 平凡像個路人呀，今日我就做好晒資料搜集，同你哋一齊盤點史上最靚嘅 Router。
第四位 – ASUS Blue Cave
ASUS Blue Cave放喺手上好似一部風扇仔咁大，外型特別，十足一部滾桶洗衣機，又有啲似 Dyson 風扇，值得讚嘅係中間珍珠藍中空設計，顏色簡約美觀，可惜背面為了散熱犧牲美感，密集恐懼者慎入。
不過，ASUS Blue Cave 始終都係一款低階 WiFi Router，白色部分「膠味濃」加上厚度十足，密集孔也容易佔塵，好睇唔好食。更慘嘅係沒有售價與發售日期。
第三位 – Google Wi-Fi
Google Wi-Fi 都出左好一段時間，大家嘅反應都唔錯，一個簡單的矮圓柱體，外型簡約襟睇，遠睇有啲似一盒粉底，加上一條發光藍邊，美感即時加分。
不過，可惜啊！Google Wi-Fi 上只有兩個上網線插口，如果你需要同時多人透過上網線上網，或連接多部 Wi-Fi 或電腦，你必須要增加一個加插器，即時令整體美感度下跌。更可悲的是香港根本沒有發售，你想博都無辦法。（我明白很多人都投訴 Google Wi-Fi上網表現，但在這文章上只集中討論外型啦）
第二位 – NETGEAR orbi
NETGEAR orbi 與 Google Wi-Fi 一樣白色為主，但機身用咗唔易花嘅物料，非常容易打理，橢圓形嘅機身設計令佢更似擺設。上面仲有多種顏色嘅燈，會隨著唔同嘅接收情怳而變色，既美觀又實用，讚！
不過，orbi 因為用最新 Mesh WiFi 系統，所以售價唔算平，網店價包送貨要 HK$3,288 港幣，新出嘅 orbi 迷你版親民點賣 HK$2,730。以一套兩機覆蓋去到 5,000 呎來計，又唔算好貴嘅，上面部 Google WiFI 單機都兩千幾…
第一位 – Norton Core
Norton Core 外型非常破格，以超多同等大小的三角形組成，呈超多邊形，設計有點像剌蝟一樣，非常突出可愛，唔講完全唔知佢係一個 Router。
可惜 Norton Core 不能打破所有破格設計的命運－睇厭，一開始非常興奮，但日對夜對，屋企無反咁上下型格，真係有啲礙眼，另一個可惜嘅地方係佢同上面提到嘅大部份 Router 一樣，香港都係無得賣，有得睇無得用。
以上各個 WiFi Router 都各有特色，但我同身邊嘅潮人都一致比較中意 NETGEAR orbi，貪佢樣靚得來又實際，大家不如都分享下你中意邊個 WiFi Router多啲，一齊討論下！