除左插錯位置會影響快充之外，有3個元素互相影響，首先當然係個叉電器本身支唔支援快充，最高支援幾多W 其次係你個裝置支唔支援，即係iPhone，iPad，電腦個D。
最後一關就係條USB線，USB線都好緊要架。如果你係用緊Vivo，小米嘅快充，但你用左條唔係原裝嘅USB線，都係做唔到快充。例如用 QC4 以上嘅快充，一部手機支援最高 27W ，需由 9V X 3A 嘅輸出組合組成。
USB-A嘅充電線最高電流係2A，如果你條USB線嘅電流係低過2A，個充電器淨係可以用 9V X 2A 即係 18W 嘅功率去叉電。 咁變相就做唔到快充嘅效果，坊間都有D測USB電流嘅測試器，係鴨療街或者上網買都係幾十蚊，如果大家真係想知自己屋企嘅USB線係咪合規格都可以買黎測下。
不過你估真係咁得閒咩，普通人買USB線唔想買完番屋企又用唔著，建議大家都係買番D大牌子，又或者用番原廠線啦，唔好貪平買D肥仔開倉十蚊廿蚊架啦。
不過，我都知原廠嘅火牛通常都比較貴，Apple 最新支援16 吋 MacBook Pro 嘅140W USB-C 火牛原廠賣緊729蚊一個，咁大家可能會想買副廠，搵D平替。
但我都建議大家買番D大牌子嘅叉電，例如係Torri、MagicPro、M2K 等等，岩先同大家介紹過嘅火牛普通價錢都係200零蚊，如果係岩先個款200W嘅充電器就會貴D，大約係600-700蚊一個，只不過一個原廠火牛都要700蚊，呢個副廠一個頂兩個嘅情況下都算抵玩。大家可以因應自己需要去選擇岩自己嘅充電器。